Употребата на западно оружје со долг дострел против Русија ќе значи директно учество на земјите од НАТО во конфликтот во Украина, најави рускиот претседател Владимир Путин.
„Доколку се донесе оваа одлука, тоа ќе значи директно учество на земјите од НАТО, САД и европските земји во војната во Украина. Тоа е нивно директно учество. И тоа, се разбира, значително ја менува самата суштина, самата природа на конфликтот. Тоа ќе значи дека земјите од НАТО, САД и европските земји се во војна со Русија. И ако е така, тогаш ќе донесеме соодветни одлуки врз основа на заканите што ќе ни бидат создадени. Односно, ако ја преместат војната на територијата на Украина на исток, таа нема да застане тука – ќе дојде и на Запад“, изјави Путин.
„Украина сама, без помош на земјите од НАТО, не е во состојба да изврши напади со модерно прецизно оружје со долг дострел. Ова е можно само со користење на разузнавачки податоци од сателити, кои Украина ги нема. Тоа се податоци само од сателити на Европската унија или САД, од сателитите на НАТО“, додаде тој.
Еден ден претходно, американскиот претседател Џозеф Бајден рече дека прашањето за давање дозвола на Киев да користи оружје со долг дострел за да напаѓа длабоко во руска територија сè уште е на маса. Притоа, британскиот весник „Фајненшл тајмс“ напиша дека на оваа тема има раскол во американската администрација, пренесува „Спутник“.