Многу западни политичари не сакаа ниту да навлезат во суштината на новиот руски предлог за регулирање на ситуацијата во Украина, иако оваа иницијатива реално може да ја запре војната, изјави рускиот претседател Владимир Путин.
Во своето обраќање до учесниците на 10. Меѓународен научен и експертски форум „Примаковски читања“ во Москва, Путин изјави дека претпоставува дека учесниците на тој состанок ќе ги разгледаат идеите на Москва за формирање систем на еднаква и неделива безбедност на евроазискиот континент, како и нов мировен предлог за решавање на украинската криза, пренесува РИА Новости.
„За разлика од многу западни политичари, кои не сакаа ни да навлезат во суштината на иницијативата што ја покренавме, верувам дека учесниците на форумот ќе размислат за рационален пристап кон неговото разгледување и ќе можат да видат дека реално предвидува можноста за прекин на конфликтот и негово политичко и дипломатско решение“, рече Путин во говорот што го прочита помошникот на рускиот претседател Јуриј Ушаков, пренесува Танјуг.
Ушаков рече и дека во светот има се поголемо разбирање дека украинскиот конфликт нема да се реши без Русија и оцени дека тоа е единствениот резултат од неодамнешната мировна конференција за Украина, одржана во Швајцарија.
Претседателот на Русија претходно презентираше нови мировни предлози за решавање на конфликтот во Украина, кои предвидуваат признавање на статусот на Крим, самопрогласените региони ДНР, ЛНР, Керсон и Запорожје во Украина како делови од Русија, утврдување на ненуклеарен статус на Украина, нејзина демилитаризација и денацификација и укинување на антируските санкции. Украинската страна ја отфрли оваа иницијатива.