Пандемијата ја зголеми сиромаштијата во Германија. Според една неодамнешна студија, 13,4 милиони луѓе живеат во сиромаштија (16,1% од населението). Студијата е спроведена од добротворната организација Paritätischer Wohlfahrtsverband, а нејзините резултати се сумирани во документ насловен „Пандемиска сиромаштија“, пишува ДВ.
Ова е нов тажен рекорд, нагласува првиот човек на организацијата Улрих Шнајдер.
Новите податоци го засилуваат негативниот тренд од последните неколку години – зголемување на уделот на сиромашните, кои во 2006 година сочинуваа 14 отсто од населението во земјата.
Секој со помалку од 60 проценти од просечниот приход за Германија може да се смета за сиромашен – земајќи ги предвид и вкупниот нето приход на целото домаќинство и дополнителните социјални плаќања како што се детски додаток или државна помош за плаќање кирија.
А може да биде полошо
Сепак, осиромашувањето на Германците за време на пандемијата можеше да достигне поалармантни размери. Неколку фактори го спречија помрачниот развој. На пример, 80% од Германците немаат претрпено финансиски загуби поради пандемијата – оваа група вклучува, на пример, пензионери, државни службеници и вработени во јавниот сектор. Други веќе живеат под прагот на сиромаштија. Сепак, фактот што во 2020 година бројот на сиромашни во Германија се зголеми за само 0,2 отсто во споредба со претходната 2019 година главно се должи на државната помош, рече Шнајдер.
„На пример, бенефициите за работниците со скратено работно време и парите за невработеност успеаја да спречат многу луѓе да влезат во групата на сиромашни за време на кризата“, рече шефот на Paritätischer Wohlfahrtsverband.
Студијата покажува дека најголеми финансиски загуби во пандемијата се регистрирани кај самовработените. Во 2020 година, 13 отсто од самовработените во Германија биле во групата „сиромашни“, според новите податоци. Во однос на претходната година, зголемувањето е за цели 4%.
Што се однесува до останатите вработени во Германија – 8,7% од нив спаѓаат во категоријата „сиромашни“, а во 2019 година тоа е околу 8%.
Огромни разлики меѓу провинциите
Најпогодени од проблемот на сиромаштија и понатаму се домаќинствата со три или повеќе деца (30,9%), самохраните родители (40,5%), како и невработените (52%) и лицата со ниско образование.
Разликите се забележани и на регионална основа: уделот на сиромашните е најмал во двете најјужни германски покраини – Баварија и Баден-Виртемберг (12,2%). За споредба, просекот во другите германски покраини е 17,7% сиромашни. Најлошо во овој поглед е провинцијата Бремен, каде уделот на сиромашните достигна 28,4% од населението. Во Мекленбург-Западна Померанија, Берлин и Саксонија-Анхалт, бројките се исто така високи – околу 20 проценти.
Потребна е поголема помош
„Еднаш сиромашен – засекогаш сиромашен“. Оваа опасност надвиснува на се повеќе и повеќе луѓе“, рече Ева Марија Велскоп-Дефа, шеф на хуманитарната организација Caritas.
Според неа, пандемијата направи видливи долгогодишни ризици поврзани со сиромаштијата. Нејзината организација повикува на поголема и побрза помош, за заштита на луѓето во паѓање во криза.