Ристо Вуков стартуваше од 16 место во првата трка од третиот гран при викенд на Порше Карера Куп Италија, но со бравурозно и зрело возење успеа да стигне до 8 место.
Патеката Имола е позната како тешка за престигнување, па тој имаше еден пробив на стартот, а потоа при судирите и излетувањата кои ги имаа неговите ривали доведоа до две излегувања на возилото за безбедност и уште два ре-старти. Во услови на голема изедначеност меѓу автомобилите и тешкотиите за престигнување, Вуков ја сочека својата шанса и ги искористи можностите во овие ре-старти за да го подобри својот пласман.
Во неделната трка која стартува во 13.15 часот со директен пренос на „Телевизија 24“, Вуков ќе појде од 8 место, при што првите 6 ќе ги ротираат своите позиции.
– Како почнав, одлично завршив! Квалификациите беа лоши, разликите мошне мали, па возачите од 9 до 16 место се разликуваа за пола секунда. Бев разочаран и немав волја да возам денес. Но, тргнав без страв, немав што да изгубам, можев само да добијам. Имав одличен старт и досега немам грешки во стартовите, тоа е добро, ми дава некоја самодоверба. Бев доволно стрплив додека траеја судирите на патеката. Го искористив тоа и малку по малку одев напред. Во последните 3-4 круга стигнав до 8 место, Кварезмини ме пројде чисто, но Фестанте во последниот свиок ме истурка при сопирање. Сепак, тој е казнет и јас сум на 8 место.
Вуков откри дека екипата има можност да искористи и еден „џокер“ бидејќи има право на тоа еднаш во текот на сезоната.
– Размислуваме со тимот, сите ние имаме право на еден нов сет гуми, тоа е „џокер“ кој може да се искористи на една од трките. Дилемата е дали тоа да го направиме на оваа трка, имаме време до изутрина да одлучиме. Ви благодарам на сите за поддршката, гледајте ја трката утре од 13.15 и навивајте!