Властите на руската област Краснојарск планираат годинава да затворат неколку затвори поради падот на бројот на затвореници предизвикан од нивната мобилизација во војната против Украина, пренесува „Комерсант“.
Руските медиуми го цитираат Марко Денисов, комесар за човекови права во Краснојарск, кој им рекол на регионалните власти дека најмалку два затвора ќе бидат затворени поради „големото еднократно намалување на бројот на затвореници во контекст на специјалната воена операција“.
Русија регрутира затвореници за својата офанзива во Украина уште од 2022 година, кога Евгениј Пригожин, водачот на платеничката група „Вагнер“ кој почина минатата година, почна да ги обиколува затворските колонии, нудејќи помилување ако „војниците“ преживеат шест месеци на фронтот.
Пригожин, кој загина во авионска несреќа набргу откако го предводеше краткотрајниот бунт против руските воени лидери, тврдеше дека регрутирал 50.000 затвореници за Вагнер.
Руските затворски власти потоа објавија статистички податоци кои покажаа остар пад на затворската популација. Руското Министерство за одбрана продолжи да регрутира осуденици за своите формации „Бура-З“.