Портпаролот на рускиот претседател Дмитриј Песков ги изнесе деталите од разговорите меѓу американската и руската делегација во главниот град на Саудиска Арабија, каде беше постигнат нов договор меѓу Русија, САД и Украина.
Русија и САД, по договорот за прекин на нападите врз енергетските капацитети во Русија и Украина постигнат пред една недела, исто така се согласија да ја спроведат Црноморската иницијатива, која има за цел да обезбеди безбедна пловидба и да спречи користење на трговски бродови за воени цели, а во суштина значи мир за морето што го делат Украина и Русија.
Според договорот, САД ќе преземат мерки за повторно да се овозможи извоз на руски земјоделски стоки и ѓубрива на светскиот пазар, да се намалат трошоците за осигурување на поморскиот транспорт и да се прошири пристапот до пристаништата и платните системи за такви трансакции.
Санкциите како клучен услов
Црноморскиот договор ќе стапи на сила дури откако ќе бидат укинати санкциите против руските производители и извозници, вклучително и оние во секторите рибарство и ѓубрива. Тој, исто така, бара укинување на ограничувањата за осигурителните компании кои се занимаваат со товар со храна, како и санкции против „Роселхозбанк“ и други финансиски институции вклучени во меѓународната трговија со храна и ѓубрива.
Меѓу условите се повторно поврзување на овие институции со SWIFT, отворање на потребните дописнички сметки и укинување на ограничувањата за руските бродови кои превезуваат храна, како и укинување на санкциите за увоз на земјоделска механизација и друга опрема потребна за производство на храна во Русија.
Тешките преговори траеја повеќе од 12 часа
Експертските тимови од Русија и САД се состанаа во понеделникот во Ријад, а разговорите траеја повеќе од 12 часа. Руската страна беше претставена од претседателот на Комитетот за меѓународни прашања на Советот на Федерацијата, Григориј Карасин и советникот на директорот на ФСБ, Сергеј Беседа.
Рускиот министер за надворешни работи Сергеј Лавров претходно денеска потврди дека преговорите се поврзани со безбедноста на пловидбата во Црното Море. Според него, Москва е подготвена да ја обнови иницијативата во поприфатлива форма, но тој нагласи дека Русија не може да верува на „зборот“ на украинската влада по ова прашање.