Русија официјално го призна Исламскиот емират Авганистан, кој е под власт на Талибанците, изјави денес специјалниот претставник на рускиот претседател за Авганистан, Замир Кабулов.
Во исто време, авганистанското Министерство за надворешни работи објави дека рускиот амбасадор во Кабул, Дмитриј Жирнов, официјално ја објавил одлуката на руската влада да го признае Исламскиот емират Авганистан, пренесува РИА Новости.
Рускиот амбасадор претходно денес се сретна со авганистанскиот министер за надворешни работи Амир Кан Мотаки, опишувајќи го официјалното признавање на Талибанците од страна на Москва како „клучно“ за зајакнување на односите меѓу двете земји.
Првата земја што ја призна власта на Талибанците
Така, Русија стана првата земја што формално ја призна администрацијата на Талибанците, која е на власт во Кабул од август 2021 година, по повлекувањето на странските трупи.
Досега, ниту една земја-членка на ОН не ја признала привремената влада на Талибанците, додека неколку земји, вклучително и Кина, ги прифатија амбасадорите назначени од талибанскиот режим. Кина го испрати својот претставник во Кабул во септември 2023 година.
Авганистан продолжува да се соочува со тешка економска криза, а САД продолжуваат да замрзнуваат околу 7 милијарди долари од девизните резерви на Авганистан.