Руските трупи ја презедоа контролата врз село во источна Украина, кое е во близина на наоѓалиште на литиум, по жесток отпор од украинските сили, изјави денеска официјален претставник поддржан од Русија, пренесува Ројтерс.
Селото Шевченко се наоѓа во Донецк, еден од четирите украински региони, покрај Крим, што Москва ги смета за своја територија во анексиите што Киев и западните сили ги отфрлаат како нелегални.
Руското Министерство за одбрана претходно во четврток објави дека Шевченко е освоена заедно со друга населба наречена Новосерхиевка.
Ројтерс не можеше независно да го потврди извештајот за бојното поле и немаше непосреден коментар од Украина. Мапирањето со отворен код од „Дип Стејт“, авторитетен украински воен блогерски ресурс, го покажа Шевченко под руска контрола.
Советските геолози кои го открија наоѓалиштето на литиум таму во 1982 година, сугерираа дека може да биде значајно. Се наоѓа на длабочина што би овозможила комерцијално рударство, а руските претставници сугерираа дека ќе се развива кога ситуацијата ќе дозволи.
„Селото Шевченко, кое се наоѓа на границата со регионот Дњепропетровск, е уште едно населено место кое има наоѓалиште на литиум. Ова беше една од причините зошто украинските вооружени сили испратија огромен број свои војници да го брант“, изјави Игор Климаковски, руски функционер во Донецк, цитиран од државната новинска агенција ТАСС.
Украинскиот геолошки завод вели дека наоѓалиштето се наоѓа на источната периферија на Шевченко и зафаќа површина од речиси 40 хектари.
Делови од рускиот печат погрешно тврдеа во јануари дека наоѓалиштето Шевченко веќе е заземено, мешајќи го со заземањето на друга населба со исто име на друго место.
Литиумот е посакуван глобален ресурс поради неговата употреба во мноштво индустрии и технологии, од мобилни телефони до електрични автомобили. Украина има резерви од околу 500.000 тони, а Русија има двојно повеќе, според проценките на американската влада.