Соединетите држави соопштија дека ќе испратат повеќе ракетни системи со долг дострел и нови прецизни артилериски гранати во Украина како дел од новиот пакет оружје вреден 400 милиони долари.
Пакетот ќе вклучува четири високомобилни артилериски ракетни системи, познати како HIMARS, со муниција, изјави за новинарите на 8 јули висок претставник на одбраната.
Официјалниот претставник, кој сакаше да остане анонимен, рече дека дополнителниот HIMARS ќе го зголеми вкупниот број на овие системи испратени во Украина од минатиот месец на 12 во обид да ја зајакне способноста на Украина да напаѓа подлабоко зад руските линии на фронтот во источниот регион Донбас.
Украинскиот претседател Володимир Зеленски на Twitter му се заблагодари на Бајден за HIMARS и гранатите, за кои рече дека се приоритетни потреби.
„Тоа е она што ни помага да извршиме притисок врз непријателот. Ја цениме вашата поддршка! Ајде да одиме заедно до победата!“ изјави Зеленски.
САД почнаа да ги испраќаат системите откако добија гаранции од Киев дека нема да ги користат за гаѓање цели на руска територија.
Украинските сили ги користеа за напад на цели како што се складишта за муниција, таргетирајќи ги со наведувани проектили истрелани од далечина надвор од дострелот на руската артилерија. Тие не ги користеа за напади надвор од Украина, додаде официјалниот претставник.
Тие „успешно гаѓаа руски локации во Украина, подлабоко зад линијата на фронтот и ја попречија способноста на Русија да спроведува артилериски операции“, рече официјалниот претставник.
Користејќи го HIMARS, Украинците успеаја „значително да ја нарушат способноста на Русите да напредуваат“, рече официјалниот претставник, во текот на изминатата недела.
Новата помош беше испратена откако Москва оваа недела објави дека ја презела целосната контрола врз украинската провинција Луганск, која заедно со Доњецк го сочинуваат Донбас, иако украинските власти велат дека нивните војници сè уште контролираат мал дел од покраината и дека тешките борби продолжиле во неколку села.
Руското Министерство за одбрана на 3 јули објави дека руската армија ја зазела целата територија на источниот украински регион Луганск. Украинската воена команда призна дека нејзините сили се повлекле од последниот преостанат град што го држеле, Лисичанск, велејќи дека одлучиле да го сторат тоа за да ги спасат животите на своите војници.
На 8 јули, шефот на кабинетот на претседателот Владимир Зеленски го повика Западот да испрати повеќе тешко оружје за да се спротивстави на, како што рече, „тактиката на изгорена земја“.
Оваа последна помош е 15-тиот пакет оружје и муниција што САД и го испратија на Украина од август минатата година.
Покрај системот HIMARS, САД ќе испратат и 1.000 артилериски гранати од 155 милиметри кои имаат зголемена прецизност и исто така ќе и помогнат на Украина да погоди одредени цели. Пакетот ќе вклучува и три тактички возила, радарски системи, резервни делови и друга опрема.
Официјалниот претставник рече дека клучна цел е да се зајакне логистиката и способностите за поправка на Украина за да може војската да ги одржува тие системи за оружје и да продолжи да се бори.
Севкупно, САД испратија помош во вредност од околу 7,3 милијарди долари за Украина од почетокот на војната во февруари.