Висок американски дипломат ја повика Северна Кореја да ја прекине најновата серија ракетни тестови и да ги продолжи преговорите, само неколку дена откако Пјонгјанг го изврши првото подводно лансирање на балистичка ракета во последните две години.
Сунг Ким, главниот американски функционер задолжен за севернокорејските прашања, го изјави ова по состанокот со јужнокорејските претставници со кои разговарале за неодамнешната серија севернокорејски ракетни тестови извршени додека во исто време е застојот меѓу дипломатијата меѓу Вашингтон и Пјонгјанг.
„Ја повикуваме Демократска Народна Република Кореја (ДНРК) да ги прекине овие провокации и други дестабилизирачки активности и наместо тоа да се вклучи во дијалог“, рече Ким, нарекувајќи ја Северна Кореја со нејзиното официјално име.
Тој рече дека САД остануваат подготвени да се сретнат со претставниците на Северна Кореја без предуслови и дека јасно ставиле до знаење дека немаат непријателски намери кон Северна Кореја.
Минатиот вторник, Северна Кореја лансираше нова балистичка ракета од подморница, што беше нејзина петта рунда тестови во последните недели. Јужнокорејските власти соопштија дека ракетата се чини дека била истрелана од подморница во рана фаза на развој.
Сепак, тоа беше првото подводно лансирање од октомври 2019 година и е технолошки најнапредно откако американскиот претседател Џо Бајден ја презеде функцијата во јануари.
Ракетите истрелани од подморници се потешко да се откријат однапред и ќе и дадат можност на Северна Кореја за секундарен, контранапад.
Со лансирањето, Северна Кореја прекрши неколку резолуции на Советот за безбедност на ОН и претставува закана за соседите на Северна Кореја и меѓународната заедница, рече Ким.
Администрацијата на претседателот Бајден постојано изјавува дека се подготвени да се сретнат со претставниците на Северна Кореја „секаде и во секое време“ без никакви предуслови.
Меѓутоа, Северна Кореја го условува враќањето на преговорите со тоа што САД ќе стават крај на, како што ја нарекуваат, непријателската политика кон Пјонгјанг. Се чини дека ова е поврзано со санкциите и редовните заеднички воени вежби меѓу САД и Јужна Кореја.