САД денеска додадоа 63 руски и 42 кинески компании на листата на санкции поради сомневањата дека и даваат поддршка на руската војска, јавија британските медиуми.
Санкциите, што вклучуваат и 18 правни лица од други земји, беа наметнати поради повеќе причини, вклучително и снабдување со американска електроника на субјекти поврзани со руската војска, производство на илјадници беспилотни летала „Шахед-136“, што ги користат московските сили против Украина, и други.
Администрацијата на американскиот претседател Џо Бајден се обидува да го задржи притисокот врз компаниите што и помагаат на Русија во нејзината војна против Украина. Иако западните земји презедоа голем број мерки против Москва, постојат индиции дека руската воена индустрија продолжува да се стекнува со американска технологија, чија употреба е ограничена, забележуваат британските медиуми.