Шпанскиот премиер Педро Санчез повторно го коментираше ставот на земјата во врска со војната на Блискиот Исток, велејќи дека бран на гордост ја зафатил како Шпанија така и целиот свет поради ставот на Мадрид.
Во интервју за шпанскиот весник „Ел Диарио“, Санчез изјави дека ставот на Шпанија е обврска на владата која тој ја предводи.
„Кога рековме „не на војната“, се појави бран на гордост што сме Шпанци, не само во нашата земја, туку и меѓу многу општества низ целиот свет. Тоа е одговор на реакционарниот бран во Шпанија, Европа и светот, и тоа е обврска на прогресивна коалициска влада“, изјави тој.
Запрашан дали е загрижен за можна одмазда од Доналд Трамп, шпанскиот премиер даде јасен одговор.
„Не. Ставот на Шпанија беше конзистентен во сите последователни војни што ги доживеавме во изминатите пет години: војната на Путин во Украина, војната во Газа… Заштитата на меѓународното право е конзистентен став на шпанската влада. Второ, ние припаѓаме на Европската Унија, а Европската комисија беше многу јасна по ова прашање. И конечно, затоа што верувам дека принудата не е патот напред. Да се биде сојузник на САД не значи да се каже „да“ за сè“, е јасен Санчез.
Иако не постои унифициран став во рамките на ЕУ, Санчез вели дека Шпанија цврсто стои зад својот.
„Во рамките на Европската Унија немаше заеднички став, за разлика од Украина. Сепак, Шпанија отсекогаш го задржуваше истиот став, без разлика дали стануваше збор за Украина, Газа или Иран – одбрана на меѓународното право. Тоа беше конзистентен став кој резонираше не само кај одредени европски влади, кои ги променија своите ставови во последните денови, туку и кај голем дел од европското општество и јавнотото мислење, кое се спротивставува на војна која нема да донесе ништо добро и нè враќа во 2003 година, кога се водеше војната во Ирак. Ќе има политички проекти кои ќе ја бранат војната во Иран, но верувам дека тие не научиле ништо и продолжуваат да прават грешки“, рече шпанскиот премиер.
Потоа се осврна и на меѓународниот поредок што моментално е на сила.
„„Вчерашниот свет“ е свет без правила. Дилемата не е стариот поредок наспроти новиот поредок, туку меѓународниот поредок наспроти меѓународниот неред, што нè доведе до две светски војни. Светот се менува, но вредностите и принципите на Европската Унија не треба. Европа мора да се залага за меѓународен поредок базиран на правила и да брани обновен мултилатерализам. Западните влади ќе мора да прават отстапки за да го направат меѓународниот систем многу порепрезентативен. Мора да го укинеме правото на вето во Обединетите нации. Иронично, двете постојани членки на Советот за безбедност се Русија и САД, две сили кои во моментов значително придонесуваат за глобалната нестабилност со војните во Украина и Иран. Ако го реформираме системот на Обединетите нации, мора да ги вклучиме големите нации како Индија, африканскиот континент, Кина и Бразил, обезбедувајќи многу поширока застапеност во овие тела“, изјави тој.
Конечно, Санчез истакна дека и покрај притисоците, Шпанија ќе остане доследна.
„Оваа војна не ја започна Шпанија. Тоа беше војна еднострано предизвикана од две нации. Понатаму, ние сме доследни на надворешната политика што ја водевме во текот на овие речиси осум години на власт. Нема да ја решиме нестабилноста на Блискиот Исток со таков очигледен чин на незаконитост“, заклучи Педро Санчез во интервјуто за „Ел Диарио“.