Рускиот патнички авион „Ан-24“, кој летал на релацијата Хабаровск-Благовешченск-Тинда, исчезнал утрово во Амурската област, потврдија службите за итни случаи, пишува РИА. Руската служба за спасување, пребарувајќи од воздух, ги забележала остатоците од авионот, односно запалениот труп на леталото.
Министерството за вонредни ситуации соопшти дека хеликоптерска единица го открила трупот на авионот во пламен.
„Спасувачите продолжуваат со пребарувањето и пристапувањето кон теренот“, се вели во соопштението, објави РТС.
Локалната служба за итни случаи истакнува дека авионот е пронајден на падината на планината, на 15 километри од Тинда.
Теренот до областа е тешко пристапен и „се верува дека нема преживеани“.
„Екипажот на авионот ја изгуби комуникацијата со контролната кула неколку километри пред аеродромот во Тинда“, објасни Службата за вонредни ситуации во Тинда.
Авионот е сопственост на компанијата „Ангара ерлајнс“, а во него имало 49 лица, меѓу кои шест членови на екипажот и пет деца, пишува ТАСС.
Според првичните информации, авионот немал пријавени технички проблеми пред губењето на контактот, пишува Ројтерс.