Сенатот на САД повторно го одобри нацрт-законот за обезбедување на 52 милијарди долари субвенции за американското производство на чипови во обид да се постигне компромис по повеќемесечни дискусии, пренесе Ројтерс.
Процедуралното гласање од 68 наспроти 28 гласа го врати предлог-законот во Претставничкиот дом за гломазна процедура со која конечно ќе започне формалниот процес познат како „конференција“ на која пратениците од двата дома ќе се обидат да договорат компромис.
Постојаниот недостиг на чипови во индустријата го наруши производството на електрични возила и електроника, принудувајќи некои компании да ја намалат својата дејност. Во исто време, се зголемуваат повиците за намалување на зависноста од други земји кога станува збор за полупроводниците.
Сенатот го усвои нацрт-законот за чипови на прво читање во јуни, кој исто така даде зелено светло за пуштање на 190 милијарди долари за подобрување на технологиите и истражувањата за да се натпреварува со Кина. Претставничкиот дом усвои рана верзија на документот на почетокот на февруари.
Нацрт-законите користат различни пристапи за решавање на конкурентноста на САД во однос на Кина за широк спектар прашања, како и за трговијата, но и за некои одредби поврзани со климата.
Претседателката на Комитетот за трговија во Сенатот, Марија Кантвел, рече дека гласањето е клучно за „отпочнување вистински преговори“.
Портпаролката на Белата куќа, Џен Саки изјави дека гласањето во Сенатот е уште еден чекор „да ги зајакнеме нашите синџири на снабдување, да произведуваме повеќе во Америка и да ја надминеме Кина и остатокот од светот во наредните децении“. Очекува Претставничкиот дом да дејствува брзо и да започне формална конференција.
Американскиот секретар за трговија, Џина Рајмондо забележува дека пред две децении, САД произведувале околу 40 отсто од светските чипови, додека денес тие сочинуваат само 12 отсто од светското производство. Гласањето во Сенатот ги придвижи Соединетите држави „еден чекор поблиску до обновување на американското производство на полупроводници, обезбедување клучни синџири на снабдување и привлекување добри работни места во производството во земјата“.
Во петокот, General Motors соопшти дека ќе го прекине производството во фабриката за пикап во Индијана на две недели во април поради недостиг на чипови.