Американскиот Сенат денеска го потврди Роберт Ф. Кенеди Џуниор како министер за здравство и социјални услуги. За потврдата на Кенеди гласаа 52 сенатори, а против 48. Поранешниот републикански лидер во Сенатот Мич Меконел, кој преживеа детска парализа, беше единствениот републиканец кој гласаше против Кенеди.
Американското Министерство за здравство и социјални услуги, кое ќе го предводи Кенеди, се состои од голем број клучни федерални здравствени агенции, вклучувајќи ги Управата за храна и лекови, Националниот институт за здравје и Центрите за контрола и превенција на болести.
Под негова јурисдикција ќе бидат и програмите за здравствено осигурување „Medicare и Medicaid“ што ги користат постарите осигуреници, сиромашните и инвалидите.
За време на сослушувањата за потврда на Капитол Хил, Кенеди негираше дека е против вакцините, велејќи им на сенаторите дека е „за безбедност“. „Верувам дека вакцините играат клучна улога во здравствената заштита“, рече Кенеди.
Кенеди (71) накратко се кандидираше за претседателската номинација на Демократската партија во 2023 година, а набргу потоа се појави како независен кандидат, а потоа ја заврши кампањата и го поддржа Доналд Трамп, пренесува „Танјуг“.