Половина од жените изјавиле дека во моментот на злоставувањето биле тинејџерки, односно дека биле помлади од 18 години. Некои рекоа дека имале само 15 години, но дека Дејвид можеби не ги знаел нивните години.
Адвокатите на Коперфилд велат дека наводите „не само што се целосно лажни, туку и целосно неверојатни“.
Инцидентите за кои го обвинуваат 67-годишниот магионичар се случиле од крајот на 1980-тите до 2014 година. Обвиненијата против него вклучуваат наводи дека дрогирал три жени пред да има секс со нив. Гардијан ги разгледувал наводите како дел од серијата приказни засновани на интервјуа со повеќе од 100 луѓе и судски и полициски досиеја.
Запрашан за нивните изјави, Коперфилд негира дека сторил нешто лошо.
Неговите адвокати за „Гардијан“ изјавиле дека тој „никогаш не се однесувал непримерно со никого, а камоли со малолетно лице“. Тие рекоа дека „вистинскиот“ портрет на Коперфилд ќе ја опише неговата „љубезност, срамежливост и однос со почит кон мажите и жените“.
Адвокатите потенцираа дека Коперфилд е силен поддржувач на движењето „MeToo“ од неговото основање, кое ги охрабрува жените да излезат и да ги раскажат своите приказни за злоупотреба и дека против него во минатото биле изнесени „многубројни лажни обвинувања“.
Една од 16-те жени, Бритни Луис, излезе во јавноста во 2018 година со наводи дека ја дрогирал и сексуално ја нападнал во 1988 година, кога таа била 17-годишна манекенка. Коперфилд ги негира обвинувањата. Друга жена рече дека имала слично искуство, наведувајќи дека таа и другарка ѝ биле дрогирани. По ова тврдење адвокатите на Коперфилд, изјавија дека дрогата „не е дел од неговиот свет“.
Во четири случаи, жените тврделе дека Коперфилд ги допирал или ги принудил сексуално да го допираат. Три од нив биле тинејџерки во моментот на наводните инциденти. 38-годишниот Фалон Торнтон за „Гардијан“ изјавила дека Коперфилд и ги стиснал градите откако ја поканил на сцената за време на настап во јануари 2014 година во казино-хотелот МГМ Гранд.
Таа ги пријавила наводите во МГМ и во Митрополитската полиција во Лас Вегас, покажуваат записите, но Торнтон вели дека нејзината изјава никогаш не била сфатена сериозно. Полицијата во Лас Вегас изјави за „Гардијан“ дека го затворила случајот поради „недоволно докази“.