За време на размена на мислења во шпанскиот Конгрес во среда, шпанскиот премиер Педро Санчез го нарече Израел геноцидна држава. Санчез ја даде својата изјава како одговор на прашање за трговијата со Израел поставено од каталонскиот претставник Габриел Руфијан.
„Ќе разјаснам една работа, г-дине Руфијан. Ние не тргуваме со геноцидна држава. Ние не тргуваме. Мислам дека од оваа платформа објаснив пред некој ден за што зборуваме, кога беа дадени некои изјави кои не се вистинити“, рече Санчез.
Шпанија јавно го обвини Израел за дела поврзани со геноцид откако се придружи на тужбата на Јужна Африка против Израел пред Меѓународниот кривичен суд, заедно со Ирска, друга земја-членка на ЕУ, и други земји.
Бројни меѓународни експерти за геноцид, невладини организации и самите Палестинци презентираа докази и тврдења дека Израел врши геноцид врз своите жители во Појасот Газа.
Во својата реакција, Израел го повика шпанскиот амбасадор во Тел Авив на разговори.
„По острите забелешки на шпанскиот премиер Педро Санчез, шпанскиот амбасадор во Израел е поканет на состанок утре во Министерството за надворешни работи во Ерусалим“, соопшти израелското Министерство за надворешни работи.