Унгарскиот министер за надворешни работи, Петер Сијарто, денес изјави дека земјите од Западен Балкан се далеку пред Украина на патот кон Европската Унија.
„Земете ја Црна Гора, земја која не претставува закана за Европската Унија во однос на големината или населението, земја која веќе е дел од Eврозоната и НАТО. Зошто Црна Гора не може и зошто Србија не може да стане членка на Европската Унија? Зошто не ја примиме Северна Македонија?“ праша Сијарто, според МТИ.
Тој рече дека „процесот заснован на заслуги“ треба да се примени и во Украина.
„Да се биде во војна не е заслуга“, додаде тој.
Сијарто изјави дека ЕУ е пример за тоа како меѓусебното почитување исчезнало од меѓународната политика, додавајќи дека и стандардот на дебатата опаднал.
„Во текот на изминатите неколку години беше многу тешко да се води рационален дијалог на европската политичка сцена, а со избувнувањето на војната во Украина, тоа стана практично невозможно“, нагласи тој.
Со враќањето на Доналд Трамп во Белата куќа, ситуацијата „веднаш се подобри“, рече Сијарто, додавајќи дека оние кои претходно беа маргинализирани сега се дел од мејнстримот и се мнозинство. Патриотизмот и суверениот став повторно стануваат дел од мејнстримот, рече унгарскиот министер за надворешни работи.
Сијарто рече дека постои огромен јаз помеѓу јавните изјави и приватните разговори меѓу земјите-членки на ЕУ за европските аспирации на Украина.
Тој нагласи дека Унгарија се залага за мир насекаде во светот, вклучително и на Кавказ.
По разговорите со ерменскиот министер за надворешни работи Арарат Мирзојан во Ереван, премиерот додаде дека унгарската влада продолжува да промовира мировен договор меѓу Азербејџан и Ерменија по години конфликт. Сијарто рече дека кога станува збор за решавање на конфликти низ целиот свет, Унгарија поддржува дипломатски решенија, пренесува Танјуг.
Претходно затегнатите односи меѓу Унгарија и Ерменија „значително се подобрија како резултат на напорите за помирување во изминатите години“, благодарение на кои „успеавме да ги репатрираме ерменските воени затвореници од Азербејџан“, рече Сијарто во соопштението од Министерството.
Унгарија отвора амбасада во Ереван, додека Ерменија ќе ја отвори својата амбасада во Будимпешта оваа година, додаде тој.