Stellantis го затвора инженерскиот оддел на Opel

од Vladimir Zorba
305 прегледи

Stellantis ќе го затвори инженерскиот оддел во германското седиште на Opel во Риселсхајм следната година, потврди портпаролот на компанијата.

Затворањето на одделението за компјутерски потпомогнат дизајн ќе значи укинување на 100 работни места.

„Нашата цел е дополнително да ја зајакнеме конкурентноста и ефикасноста во сите области на компанијата“, вели портпаролот на Stellantis.

Компанијата ги известила инженерите и другите работници за планираното затворање минатата недела, според советот на работниците на Opel, што го виде dpa.

„Opel очигледно повеќе нема да има проектни инженери во иднина“, се наведува во меморандумот, а работниците ќе бидат префрлени на програми во Opel и на околу 30 отворени позиции во други делови на компанијата.

Портпаролот на Stellantis, сепак, тврди дека Риселсхајм „е важен дел од глобалната развојна мрежа на Stellantis и ќе ја задржи таа позиција во иднина“.

Opel е единствената германска марка во автомобилската групација Stellantis, која беше создадена во 2020 година со спојување на италијанско-американската автомобилска групација Fiat-Chrysler со француската групација PSA, матичната компанија на Peugeot и Citroen.

Откако Groupe PSA ги купи Opel и нејзината британска сестринска компанија Vauxhaul Motors од американскиот автомобилски гигант General Motors во 2017 година, илјадници работни места беа укинати во германскиот производител.

На крајот на минатата година, групацијата Stellantis имаше нешто повеќе од 13.000 вработени со полно работно време во Германија, вклучително и околу 9.000 во Риселхајм.

Слични содржини