Генералниот секретар на НАТО Јенс Столтенберг денеска изјави дека НАТО нема да испраќа војници во Украина.
„НАТО не планира да распореди војници во Украина, а украинската влада не поднесе такво барање“, рече Столтенберг на прес-конференција во Брисел по состанокот на министрите за надворешни работи на земјите од Алијансата.
Едно од главните прашања на овој состанок е продолжувањето на воената помош за Украина, рече Столтенберг и наведе дека е одржана и средба во формат на Советот на НАТО -Украина на која учествуваше и министерот за надворешни работи на Украина Дмитро Кулеба.
„Ситуацијата на бојното поле останува сериозна. На Украина и треба повеќе воздушна одбрана, повеќе муниција и повеќе помош“, нагласи Столтенберг.
Тој ја поздрави континуираната поддршка од сојузниците, која вклучуваше најава за германска артилериска помош од 600 милиони евра, 10.000 беспилотни летала од Обединетото Кралство и повеќе проектили и оклопни возила од Франција, како и новиот пакет помош од 188 милиони евра од Финска, истакнувајќи дека НАТО треба дури уште повеќе да ја искаже поддршката.