Меѓународната анализа на истражувачот Амит Рој покажа дека климатските промени може да го скратат животниот век за околу половина година. Студијата беше објавена во средината на јануари во научното списание PLOS Climate. Ова е само едно во низата предупредувања за тоа колку длабоко глобалното затоплување предизвикано од согорувањето на фосилните горива продира во нашите животи.
Живееме на планета која е за 1,2 °C потопла отколку во прединдустриската ера. Покрај порастот на температурата, уште еден јасен показател за климатските промени е нарушувањето на шемите на врнежи.
Последиците од овие климатски промени ги чувствуваме на нашата кожа – од акутни и директни, како што се почести и пожестоки природни катастрофи (на пр. топлотни бранови и поплави) до помалку очигледни и поиндиректни, но подеднакво вознемирувачки, како што се оштетено респираторно или ментално здравје.
Иако сите наведени влијанија се забележани и проучени во научни трудови, до сега не се знаеше точно колку климатските промени всушност го скратуваат нашиот животен век.
Според тоа, авторот на новата студија утврдил директна врска помеѓу климатските промени и нашиот животен век, се наведува во соопштението. Резултатите покажуваат дека зголемувањето на просечната годишна температура од 1 °C може да предизвика скратување на животниот век за 0,44 години или пет месеци и една недела.
Анализата на Амит Рој дава само широка слика за светот, врз основа на температурата и врнежите. Затоа, научникот сугерира дека истражувањето треба да се спроведе со осврт на специфични временски екстреми на пониско, локално ниво, како што се, на пример, шумски пожари и цунами.
– Како што открива оваа студија, глобалната закана од климатските промени, која ја поткопува благосостојбата на милијарди луѓе, ја нагласува итната потреба да се третира како криза на јавното здравје – рече Рој, додавајќи дека намалувањето на стакленички гасови и проактивни иницијативи се клучни за заштита на должината на животот и здравјето на жителите ширум светот.
Покрај тоа, климатските промени имаат понегативно влијание врз животниот век на жените. Според тоа, треба да им се посвети поголемо внимание како луѓе на првата линија на климатските промени, се наведува.
За да дојде до своите наоди, Амит Рој ги анализирал податоците за просечната температура, врнежите и очекуваниот животен век од 191 земја од 1940 до 2020 година. Во постојната емпириска литература, бруто домашниот производ (БДП) по глава на жител е најважната детерминанта на должината на живот, а овие пресметки беа користени како контролна променлива за драстични разлики меѓу земјите.