Обединети во гнев, студенти и пензионери, левичари и ултра националисти, ја обвинуваат владата на турскиот претседател Реџеп Таип Ердоган за авторитаризам и загрозување на секуларните и демократските вредности на земјата, по апсењето на Екрем Имамоглу, градоначалникот на Истанбул и еден од најсериозните предизвикувачи на Ердоган на изборите.
Додека властите тврдат дека Имамоглу е корумпиран и дека помагал на забранета курдска организација, а владата негира мешање во работата на судството, критичарите не се сомневаат дека обвинувањата се политички мотивирани. Демонстрациите, кои се проширија со митинзи на Републиканската народна партија, сега ги водат студенти, кои тврдат дека не им веруваат на политичарите без разлика дали се на власт или во опозиција.
Асошиејтед прес наведува дека демонстрациите во Турција собираат млади и стари, мавтаат со ултранационалистички симболи и извикуваат левичарски слогани на улиците, но професорот на Универзитетот Сабанц, Берк Есен, вели дека мнозинството се млади, образовани и урбани жители на возраст меѓу 18 и 25 години, без јасно политичко единство.
Повеќе од 2.000 луѓе, вклучително и новинари, беа приведени, а околу 300 од нив беа уапсени за „незаконски протести“ или „тероризам“. Адвокатите тврдат дека притворите се неоправдани и дека бројот на апсења е невообичаено голем.
Пред судовите, јавува АП, родителите го чекаат ослободувањето на учениците и тврдат дека биле приведени и малтретирани. Адвокатите предупредуваат и на злоупотреба, преполни ќелии и отежнат пристап до храна за време на Бајрам, како и дека студентите ризикуваат да бидат исфрлени од универзитетот, пренесува „RT Balkan“.
Полицијата ги отфрли обвинувањата за сексуална злоупотреба во притвор, тврдејќи дека е заснована на клевета, а турското МВР пријави 150 повредени полицајци во судирите, со употреба на солзавец и пластични куршуми.