Министерот за внатрешни работи на Косово, Џељаљ Свечља вели дека обвинението поднесено од Специјалното обвинителство на Косово за случајот со нападот во Бањска во северно Косово, во кој беше убиен припадник на косовската полиција, е „задоцнето и нецелосно“.
Свечља во денешното интервју за Радио Слободна Европа вели дека во обвинението не се опфатени некои команданти на српската војска, кои, како што вели, „овозможиле обука на терористичката група, но и ја снабдувале со воено оружје“ што полицијата го запленила.
„На пример, имаме неспорни докази дека оваа терористичка група одржала воени вежби на Пасуланске Ливаде, која е официјална касарна на српската армија, каде што (српскиот претседател, Александар) Вучиќ оди речиси секој месец и надгледува различни обуки. за припадници на различни армиски или полициски единици“, вели Свечља.
Според него, денес, една година по нападот, безбедносната ситуација во Косово, нарочито на северот на земјата, населен со мнозинско српско население, е „многу, многу поодобра“.
„Можам слободно да кажам дека е мирно и стабилно на целата територија на Косово, со посебен акцент на четирите северни општини, каде за овие четири години од нашата влада, но и од војната (во 1998-99 година), имавме инциденти, проблеми, сериозни проблеми несигурност… Но, можам слободно да кажам дека имаме сосема друга ситуација“, изјави Свечља за Радио Слободна Европа.
На 24 септември минатата година терористичка група ја нападна косовската полиција во Бањска кај Звечан, при што беше убиен наредникот Африм Буњаку.
Во размената на оган што уследи, загинаа и тројца од групата српски напаѓачи.
Косовските лидери постојано го обвинуваат раководството на Србија за овој напад, иако таа ја негира одговорноста.
Неколку дена пред првата годишнина од нападот, Специјалното обвинителство на Косово поднесе обвинение за случајот, во кое се опфатени 45 лица, вклучително поранешниот потпретседател на партијата на косовските Срби, Српска листа, Милан Радоичиќ, кој ја презеде одговорноста како водач на групата што го изврши нападот.