Светската здравствена организација (СЗО) повика на „итна и усогласена акција“ за заштита на децата од контаминирани лекови по низата смртни случаи поврзани со сирупите за кашлица минатата година.
Минатата година, повеќе од 300 деца, главно на возраст под пет години, починаа во Гамбија, Индонезија и Узбекистан од акутна бубрежна инсуфициенција предизвикана од контаминирани лекови, соопшти СЗО, пренесува Хина.
Сирупите за кашлица без рецепт имаа високи дози на диетилен гликол и етилен гликол во нив.
„Тоа се токсични хемикалии кои се користат како антифриз и можат да бидат смртоносни дури и ако се земаат во мали количини, поради што никогаш не треба да се најдат во лековите“, се вели во соопштението.
Агенцијата на Обединетите нации соопшти дека седум земји пријавиле контаминација со сируп во изминатите четири месеци и ги повикуваат сите 194 земји-членки да спречат нови смртни случаи. СЗО веќе испрати предупредувања за одредени производи во октомври минатата година и на почетокот на овој месец.
Сирупите за кашлица направени од индиските Maiden Pharmaceuticals и Marion Biotech, кои се поврзани со смртни случаи во Гамбија и Узбекистан, побарано е да се отстранат.
Минатата година беше издадено предупредување за сирупи за кашлица од четири индонезиски производители: PT Yarindo Farmatama, PT Universal Pharmaceutical, PT Konimex и PT AFI Pharma кои се продаваа на домашниот пазар.
Компаниите тврдат дека нивните производи не биле контаминирани или одбија да го коментираат случајот во очекување на истрага.