Украинскиот претседател Володимир Зеленски изјави дека неговата земја е подготвена за мировни преговори со Русија, но не и во Белорусија, која ја поддржува инвазијата на Москва.
Зборувајќи во видео порака во неделата, Зеленски ги наведе Варшава, Братислава, Истанбул, Будимпешта или Баку како алтернативни места. Тој рече дека се можни и други локации, но јасно стави до знаење дека Украина не го прифаќа рускиот избор на Белорусија.
Кремљ претходно објави дека руската делегација пристигнала во белорускиот град Гомељ на разговори со украинските претставници, пренесе агенцијата АП.
Портпаролот на Кремљ, Дмитриј Песков, рече дека во делегацијата има воени претставници и дипломати.
„Руската делегација е подготвена за разговори, а ние сега ги чекаме Украинците“, рече Песков.