Европа е „наш сојузник“, но не може да биде „постојан вазал“ на САД во однос на безбедноста и трговијата, изјави американскиот потпретседател Џеј-Ди Венс во вторникот во интервју за британскиот сајт „UnHerd“.
„Сметаме дека Европа е наш сојузник. Едноставно сакаме сојуз во кој Европејците ќе бидат малку понезависни, а тоа ќе влијае на нашата безбедност и трговските односи“, рече Венс, кој постојано ги напаѓа европските лидери.
„Не е добро за Европа и не е во интерес на Америка, Европа да биде постојан вазал на САД во однос на безбедноста“, рече тој.
Откако се врати во Белата куќа, Доналд Трамп ги повика Европејците да трошат повеќе за сопствената одбрана и остро ја критикуваше Европската унија, обвинувајќи ја дека води нефер трговска политика кон САД.
И Венс постојано ги критикуваше европските лидери, велејќи во февруари во говорот одржан во Минхен дека тие не се борат доволно цврсто против имиграцијата и дека слободата на говор е под закана во Европа.
„Реалноста е брутално да се каже, но вистинито дека целата европска безбедносна инфраструктура е субвенционирана од Соединетите Американски Држави“, рече Венс.
Тој додаде дека „со исклучок на Франција, Обединетото Кралство и Полска, повеќето европски земји немаат армија способна да гарантира нивна одбрана“.
На почетокот на март тој ги шокираше Европејците со изјавата дека за Украина, склучувањето економски договор со САД би било „подобра гаранција за безбедноста отколку 20.000 војници од земја која не била во војна 30 или 40 години“.
„Не мислам дека понезависна Европа е лоша работа за Соединетите држави“, рече тој.
Осврнувајќи се на преговорите меѓу Лондон и Вашингтон за склучување билатерален економски договор, Венс рече дека тие имаат „добри изгледи“ да резултираат со „одличен договор што ќе биде во најдобар интерес за двете земји“.