Новиот модел на вештачка интелигенција „Аурора“ ги надминува сегашните методи во предвидувањето на квалитетот на воздухот, временските обрасци и тропските бури предизвикани од климатските промени.
Новиот систем, наречен Аурора, кој сè уште не е во комерцијална употреба, генерираше десетдневни временски прогнози и ги предвиде патеките на ураганите попрецизно и побрзо од традиционалните методи за прогнозирање, со значително пониски трошоци, објавија истражувачите во списанието „Nature“, пренесува РТС.
„За прв пат, еден единствен систем за вештачка интелигенција може да ги надмине сите оперативни центри во прогнозирањето на урагани“, рече водечкиот автор Парис Пердикарис, вонреден професор по машински инженеринг на Универзитетот во Пенсилванија.
„Аурора“, која беше обучувана исклучиво врз основа на историски податоци, беше во можност да ги предвиди сите урагани во 2023 година попрецизно од оперативните центри како што е Националниот центар за урагани на САД.
Според студијата, пресметковните трошоци за работа на „Аурора биле неколку стотици пати пониски.
Овие експериментални резултати доаѓаат веднаш по моделот „Pangu-Weather“, кинески систем за вештачка интелигенција развиен од технолошкиот гигант „Huawei“ во 2023 година, и би можеле да најават промена на парадигмата во начинот на кој главните светски метеоролошки агенции го предвидуваат времето и потенцијално смртоносните екстремни настани поттикнати од глобалното затоплување.
Светиот Грал на предвидувањето
„Верувам дека сме на почетокот на ера на трансформација во науката за атмосферските системи. Во следните пет до десет години, светиот грал ќе биде градење системи што можат директно да обработуваат податоци од далечински сензори како што се сателити и метеоролошки станици за да генерираат прогнози со висока резолуција за кој било дел од светот“, рече Пердикарис во видео презентација објавена од „Nature“.
Според неговите креатори, Аурора е првиот модел кој постојано ги надминува седумте центри за прогнозирање во предвидувањето на патот на разорните циклони во период од пет дена.
На пример, во симулација, „Аурора“ точно предвиде четири дена однапред каде и кога тајфунот Доксури, за кој се верува дека е најразорниот тајфун регистриран во Тихиот Океан, ќе ги погоди Филипините. Официјалните прогнози од 2023 година во тоа време покажуваа дека тајфунот ќе помине северно од Тајван.
Моделот на „Мајкрософт“ исто така го надмина моделот на Европскиот центар за среднорочни временски прогнози (ECMWF) во 92 проценти од времето за глобални 10-дневни прогнози, на скала од приближно 10 квадратни километри.
„ECMWF“, кој дава прогнози за 35 европски земји, се смета за златен стандард во точноста на временската прогноза.
Во декември, моделот „GenCast“ на „Google“ ја надмина точноста на Европскиот центар во повеќе од 97 проценти од 1.320 климатски катастрофи регистрирани во 2019 година.
Ветувачката, но сепак експериментална изведба, заснована на реални настани, е внимателно следена од научната и метеоролошката заедница.