Кенискиот претседател Вилијам Руто за прв пат се огласи за антивладините протести што доведоа до повици за негова оставка, повикувајќи ја полицијата да им „скрши нозе“ на оние што ограбуваа и палеа имот за време на демонстрациите.
„Доста е“, рече тој, додавајќи дека нема да дозволи „анархија“ во земјата маскирана како мирни демонстрации.
„Секој што пали туѓ имот треба да биде застрелан во ногата, хоспитализиран, а подоцна изведен пред суд по закрепнувањето. Не ги убивајте, скршете им ја ногата“, рече тој додека ја обиколуваше локацијата во Најроби каде што се наоѓа еден од проектите на неговата администрација за прифатливо домување.
Протестите траат со недели поради смртта на блогер во притвор. Тензиите се зголемија откако полицаец застрела цивил од блиску за време на демонстрациите против полициската бруталност. Полицијата се судри со демонстрантите, при што загинаа 50 лица, а повеќе од 100 беа повредени. Повеќе од 500 беа уапсени.
Високиот комесар на ОН за човекови права, Фолкер Турк, повика да се исполнат барањата што доведоа до протестите.
„Можете да ме викате како сакате, но јас ќе се погрижам да има мир и стабилност во Кенија“, рече Руто.
Претседателот им го прочита Законот за контрола на немирите на своите политички пртовници, за кои рече дека се обидуваат да ја соборат неговата влада преку насилство, додавајќи дека секој напад врз полициска станица е објава на војна.
„Ова е демократска земја и граѓаните се тие што го одредуваат своето лидерство преку избори. Ние не можеме да одлучуваме за лидерството преку насилство“, рече Руто.
Групите на граѓанското општество постојано повикуваат на воздржаност на полицијата за време на демонстрациите.