Прогласена е вонредна состојба поради слободното шетање на дивото животно, која ќе биде на сила најмалку еден месец, или додека не се фати ѕверот, објави Еуроњуз.
Во потрагата се вклучи и експерт кој веќе ловел ваков вид предатор во Африка. Од понеделник, на дрвјата каде што дивата мачка сака да се качува се поставуваат мамки. Поставена е и мамка за привлекување на леопардот.
„Животното сè уште не е пронајдено на територијата на паркот. Потрагата по него продолжува. Поставени се сите фото-стапици, но нема нови траги и фотографии од животното веќе четири дена“, изјави на брифинг Георги Крастев, директор на Националниот парк Централен Балкан во Бугарија.
Неговиот колега Димитар Мирчев нагласи дека во моментов се гради профил на животното, кое не е во неговата природна средина.
„Ова е многу комплицирано. Бидејќи не знаеме кога излегол од приватен дом, ниту дали е одгледано таму. Одгледувањето во дом ги менува навиките на животното. Ако претпоставиме дека овој предатор лови ноќе, а се одмара преку ден, малку е веројатно дека некој сопственик на такво егзотично животно би станал во два часот наутро за да го нахрани, бидејќи има такви природни инстинкти“, објасни тој.
Директорот на Регионалната дирекција Шумен при Министерството за внатрешни работи, виш комесар Георги Гендов, нагласи дека се проверуваат сите информации за можниот сопственик на црниот леопард.
„Сакам да нагласам дека не заштитуваме никого и не криеме никакви информации што ги дознавме за време на истрагата“, рече тој.
Додаде дека има сведок кој тврди дека го видел животното додека возел на работа во понеделник.
„Овие информации моментално се проверуваат. Ќе разјасниме сè во следните 24 часа“, рече тој.