Протестот за поддршка на уапсениот градоначалник на Истанбул, Екрем Имамоглу, резултираше со судири меѓу полицијата и студентите на универзитетот во градот.
Студентите протестираа против неговото апсење, како и поради поништување на диплома на Имамоглу од страна на Универзитетот во Истанбул во вторникот поради наводни неправилности, објавија турските медиуми.
Стотици студенти ги пробија полициските барикади, а на некои места ескалираа тензиите по суровата полициска интервенција. За време на судирот, голем број студенти паднале на земја.
Претходно, демонстрантите кои денеска протестираа пред главното седиште на полицијата во Истанбул изјавија дека приведувањето на главниот политички ривал на турскиот претседател Реџеп Таип Ердоган, градоначалникот на градот Екрем Имамоглу е удар за турската демократија.
Повеќе од 100 луѓе се собраа во близина на седиштето на полицијата, каде што беше одведен Имамоглу по неговото апсење, изразувајќи поддршка за градоначалникот пренесе „Ројтерс“.
Турските власти утринава го приведоа Имамоглу од главната опозициска Републиканска народна партија (ЦХП) под обвинение за корупција и помагање на терористичка група, што доведе до протести и бес од опозицијата.
Безбедносните сили ги блокираа улиците кои водат до седиштето на полицијата, а беа распоредени единици на полицијата за борба против нереди, како и камиони со водени топови.
Имамоглу во своето прво обраќање по апсењето на платформата „X“ рече дека турскиот народ ќе одговори на „лагите, интригите и замките“ насочени против него.
Турските власти воведоа ограничувања на пристапот до социјалните медиуми, вклучително и „X“, „Јутјуб“, „Инстаграм“ и „ТикТок“, по апсењето на Имамоглу и 100 други, вклучувајќи го и помошникот на градоначалникот, Мурат Онгун.
Канцеларијата на градоначалникот на Истанбул ги забрани сите јавни собири откако Имамоглу беше уапсен.
Имамоглу (54) ги засили критиките кон Ердоган и турската влада во последниве месеци, што предизвика обвиненија против него.
Универзитетот во Истанбул во вторникот објави дека му ја укинал универзитетската диплома на градоначалникот Имамоглу поради наводни неправилности кои не се во согласност со прописите на Одборот за високо образование.
Потегот на универзитетот дојде во време на репресијата на турската влада против опозициските лидери, особено Имамоглу, објави Ројтерс.
Адвокатот на Имамоглу минатата недела за агенцијата изјави дека нема неправилности во однос на дипломата на градоначалникот и дека не очекуваат незаконска одлука.
Имамоглу е главниот политички ривал на турскиот претседател Реџеп Таип Ердоган, а опозицијата за неколку дена треба да го избере својот претседателски кандидат на следните избори.
Лидерот на ЦХП, Озгур Озел, рече дека партијата, без оглед на одлуката на универзитетот да ја поништи дипломата, ќе го номинира Имамоглу за свој претседателски кандидат на 23 март за изборите во 2028 година.
Ако одлуката на универзитетот биде потврдена, Имамоглу нема да може да се кандидира за претседател, бидејќи високото образование е неопходен услов со закон, пренесува Танјуг.