Се прашувате каде луѓето најуспешно ги балансираат работата и приватниот живот? Одговорот го дава магазинот, „Травел“, а Луксембург е на врвот на листата.
Листата на земји со најдобар баланс помеѓу работата и приватниот живот е направена земајќи ги предвид неколку клучни фактори: просечниот број на работни часови неделно, должината на годишниот одмор, квалитетот на спиењето, очекуваниот животен век и општото чувство на среќа, пишува „Вечерњи.хр“.
Луксембург го зазеде првото место благодарение на неговите исклучителни стандарди. Една од причините за тоа е системот кој ги наградува постарите вработени со дополнителни денови за одмор. Така, работниците на возраст над 55 години имаат просечно 36 дена платен одмор годишно.
Дополнително, просечната плата во Луксембург е околу 5.000 евра, а повеќе од 65 отсто од жителите поседуваат сопствен автомобил. И покрај малата популација од околу 600.000 луѓе, квалитетот на животот во оваа земја се смета за еден од најдобрите во Европа.
На второто и третото место се Австрија и Данска, кои на своите вработени им нудат минимум 25 дена платен одмор годишно. Од друга страна, Соединетите Американски Држави се на 87. место. Причината за тоа е недостатокот на платено слободно време загарантирано со закон и широкото незадоволство од квалитетот на сонот кај населението.