На 20 април, денот на раѓањето на Адолф Хитлер, три нацистички знамиња со кукасти крстови биле поставени на влез на автопатот во населбата Есингеледен во Стокхолм, главниот град на Шведска.
Портпаролот на полицијата во Стокхолм, Мац Ериксон, изјави дека е отворена истрага за кривично дело сторено од омраза. Тој нагласи дека такви симболи не се прифатливи во шведското општество.
„Не е во ред вакви нешта да се појавуваат кај нас“, рече Ериксон, посочувајќи дека влезовите на автопатите често се користат за објавување политички пораки, поради густата сообраќајна фреквенција.
Знамето поставено во чест на роденденот на диктаторот
Ериксон додаде дека најверојатно знамињата биле поставени во чест на роденденот на нацистичкиот диктатор Адолф Хитлер, кој е роден на 20 април.
Полицијата во моментов работи на идентификација на сторителите, а јавноста е повикана да пријави какви било информации поврзани со инцидентот.
Овој чин предизвика остри реакции во шведската јавност, која бара засилени мерки против ширење на екстремистички симболи и говор на омраза.