Војници од 20 земји ќе се соберат на воена вежба во Босна и Херцеговина од 17 октомври до 22 ноември, соопшти Европската мировна мисија во Босна и Херцеговина (ЕУФОР).
Тие се собираат за „да ја покажат способноста и решителноста на ЕУФОР да придонесе за безбедна и стабилна средина за народот на Босна и Херцеговина“.
„Како и претходните години, ЕУФОР привремено ќе го зголеми своето присуство преку зголемување на бројот на војници, зајакнување на патролирањето и одржувањето на тактички вежби на избрани урбани и рурални локации, тесна соработка со вооружените сили на Босна и Херцеговина, локалните заедници и органите за спроведување на законот“, се вели од ЕУФОР.
Исто така, се нагласува дека оваа воена вежба ја покажува посветеноста на Европската унија за европската иднина на Босна и Херцеговина и на сите нејзини граѓани.
Мандатот на ЕУФОР во Босна и Херцеговина секоја година го обновува Советот за безбедност на ОН. Годинава истекува на 3 ноември.
Во БиХ моментално има 1.100 војници на ЕУФОР, но со активирање на резервните трупи од странство може да бидат ангажирани вкупно 3.500 војници.
Мировната мисија на ЕУФОР во Босна и Херцеговина е најдолгата воена операција на ЕУ и единствената мисија која има извршен мандат да употреби сила.
Силите на ЕУФОР се распоредени во БиХ од 2004 година.
На почетокот ги имаше околу 7.000, но тој капацитет беше намален со подобрување на безбедносната состојба во државата.
Официјалниот мандат на сите странски воени мисии во Босна и Херцеговина е да обезбедат спроведување на Дејтонскиот мировен договор, со кој заврши војната во Босна и Херцеговина, и да „придонесат за безбедна средина“.
Се спроведува на терен со користење на средствата и капацитетите на НАТО, врз основа на договорот со НАТО познат како „Берлин плус“.
Бројни детали од овој договор меѓу НАТО и ЕУ се означени како тајни, а она што е познато е дека е обезбедена размена на доверливи информации меѓу институциите на ЕУ и НАТО.
Според договорот од 2003 година, ЕУ и НАТО можат во секое време и за краток временски период да распоредат дополнителен број војници во БиХ во случај на закана за безбедноста на оваа земја.
Тие воени сили, според резолуциите на Обединетите нации, имаат извршен мандат кој вклучува употреба на сила, особено за одбрана од напад или закана од напад.