Возрасните и тинејџерите се загрижени за времето кое го поминуваат користејќи ги своите паметни телефони, па се свртуваат кон „глупави“ модели. Во поставките на паметниот телефон, постои опција за прикажување на просечното време што корисникот го поминува користејќи го уредот во текот на денот, а овие податоци можат да претставуваат непријатно сознание дека она што требало да биде корисен уред станало опсесија.
„Социјалните медиуми се базираат на „страв од пропуштање“, па се чувствував како да не можам да се ослободам од него. Штом направив профил на Инстаграм, работите тргнаа надолу“, вели 16-годишниот Лук Мартин од Канада.
Според истражувањето на Универзитетот Харвард, користењето на социјалните мрежи го активира истиот дел од мозокот како супстанците кои предизвикуваат зависност. Ова предизвика загриженост за навиките за користење мобилни телефони кај младите.
Истражувањето на Офком во Велика Британија проценува дека околу четвртина од децата на возраст од пет до седум години сега имаат свои паметни телефони. Некои студии докажаа врски помеѓу употребата на социјалните медиуми и негативното влијание врз менталното здравје, особено кај децата.
Некои активисти сакаат да воведат старосни ограничувања за користење на паметни телефони. Други, како Лук, избираат да ги заменат своите паметни телефони со многу поедноставни уреди, таканаречени „глупави телефони“. Неговиот нов мобилен телефон дозволува само испраќање текстуални пораки, остварување повици, користење на мапата и неколку други ограничени алатки.
„Моите пријатели го користат својот паметен телефон четири до пет часа на ден, а јас го користев толку многу пред да го купам новиот. Сега го користам мојот мобилен телефон по 20 минути дневно, што е многу добро бидејќи го користам само за она што е неопходно“, рече Мартин.
И родителите се свртуваат кон „неми“ мобилни телефони, не само за своите деца, туку и за да си помогнат да бидат поприсутни во семејството.