Српскиот премиер Милош Вучевиќ денеска изјави дека црвеното ниво на безбедност во Србија ќе продолжи уште некое време, но и дека сите безбедносни служби во Србија работат на откривање на верските екстремистички ќелии.
Тој за телевизијата „Блиц“ изјави дека акција за разбивање на сите екстремистички ќелии се спроведува на територијата на Србија и дека истата ја спроведуваат полицијата и Безбедносно информативната агенција во координација со надлежното обвинителство.
„Тие спроведуваат понатамошни дејствија за разбивање на сите оние ќелии на екстремни верски организации кои ја злоупотребуваат религијата и верата заради постигнување одредени екстремни политички и терористички цели. Овие активности се вршат на територијата на цела Република Србија, многу е важно да кажам дека овие активности не се насочени против ниту една етничка или верска група“, нагласи Вучевиќ.
Тој им порача на припадниците на муслиманската вероисповед да не се чувствуваат загрозени и ги замоли сите кои не припаѓаат на оваа вероисповед да не ги гледаат своите соседи и сонародници како опасност.
„Црвениот степен ќе трае уште неколку дена и затоа е важно Бошњаците да не даваат несоодветни изјави, бидејќи ова не е никаков лов кон нив, ова е борба против тероризмот. Ова е напад на државата, но ова е напад и на наш граѓанин, врз полицаецот на нашата држава „Мислам дека ова е изолиран случај, но не можам да гарантирам дека ова нема да поттикне некој друг“, рече Вучевиќ.