Xiaomi го собори рекордот на Нирбургринг со својот електричен прототип со четири врати Xiaomi SU7 Ultra Prototype, а потоа ја претстави сериската верзија на предводникот во Пекинг.
Извршниот директор на Xiaomi, Леи Јун, откри дека SU7 Ultra поминал круг на „Зелениот пекол“ со време од 6:46.874 додека британскиот возач Дејвид Питард, кој победи на трката 24 часа во Нирбургринг во 2023 година, беше зад воланот. Возејќи го SU7 Ultra Prototype, тој постигна импресивно време, кое беше за повеќе од 20 секунди подобро од времето на Porsche Taycan Turbo GT.
Уште поимпресивен факт е дека рекордот е постигнат во еден обид, а треба да се истакне и дека автомобилот останал без струја во период од 10 секунди. Да не се случеше тоа, ќе беше многу побрз.
Откако беше потврден подвигот во Нирбургринг, за време на презентацијата беше подигната завесата од серискиот модел. Засега не е јасно зошто друмскиот модел не се тркаше на Нирбургринг, но Xiaomi ветува речиси исти перформанси како и прототипот, со исклучок што нема да биде толку екстремен.
Како и прототипот, SU7 Ultra има три електрични мотори со вкупна моќност од 1.548 КС. Овој систем се состои од два водечки V8 на Xiaomi и еден електричен мотор V6s, што го прави автомобилот значително помоќен од Tesla Model S Plaid и Lucid Air Sapphire. Од 0 до 100 km/h забрзува за само 1,98 секунди, 200 km/h достигнува за 5,86 секунди, додека максималната брзина е 350 km/h.
Моторите се напојуваат со батерија CATL Qilin 2.0, која и покрај екстремниот фокус на перформансите на автомобилот овозможува опсег од 630 километри на дарежливиот CLTC циклус. Xiaomi значително ги подобри системите за ладење со цел болидот да обезбеди одлични перформанси на патеката, а меѓу другото ги подобри и перформансите на компресорот, пумпата за вода, вентилаторот и ладилникот. Болидот може да заврши два круга по ред на Нирбургринг без прегревање.
Секоја лимузина со четири врати со повеќе од 1.500 КС има потреба од „сериозни“ сопирачки, а SU7 Ultra не е исклучок. Стандардно доаѓа со карбон-керамички дискови на сите четири тркала, а потребни се 30,8 метри за да запре од 100 km/h. Предните дискови имаат дијаметар од 430 mm и моментално се најголемите карбонски дискови на еден автомобил. Akebono ги испорача клештите на сопирачките, кои доаѓаат со шест клипови напред и четири клипови назад.
Xiaomi ги подобри воздушните пружини и амортизерите со двојни комори, а по желба на купувачот, можно е да се добијат амортизери Bilstein EVO TI со 10 нивоа на компресија и отскокнување. Комплексен систем за дистрибуција на вртежен момент е стандарден и може да ја прилагоди моќноста на моторот до 500 пати во секунда.
Визуелно се гледа дека серискиот SU7 Ultra не е толку екстремен како прототипот. Нему му недостига задното крило со спецификации за автоспорт, кое е заменето со помал спојлер. Предниот дел е помалку екстремен, но сепак се разликува од послабите верзии на електричниот седан благодарение на новиот сплитер и поголемите доводи за воздух. Други подобрувања вклучуваат активен заден дифузор, кој се прилагодува додека возите, а има и нови странични прегради. Автомобилот создава 258 килограми надолна сила.
Внатре е нов волан со рамен горен и долен дел, покриен со Alcantara. Исто така, има детали од јаглеродни влакна, како и црвено копче Boost. Остатокот од внатрешноста е исто така украсен со Alcantara, а клиентите можат да сметаат на поспортски кориснички интерфејс на контролната табла, head-up дисплеј и инфозабавен екран. Апликацијата наречена Racetrack Master е достапна и им овозможува на возачите да ги снимаат своите кругови, како и клучните параметри за изведба.
Првите испораки до клиентите се очекуваат во 2025 година, а цената на моделот SU7 Ultra е околу 114.000 долари. Во првите 10 минути по претставувањето на автомобилот, Xiaomi доби 3.600 депозити.