Кинескиот технолошки гигант Huawei Technologies очекува значително повисоки приходи оваа година, објави членот на одборот Кен Ху, нагласувајќи го закрепнувањето во бизнисот со мобилни телефони по долгогодишните проблеми со трговските ограничувања во САД.
Компанијата ќе ја заврши оваа година со приход од повеќе од 700 милијарди јуани (98,5 милијарди долари), напиша Ху во новогодишната порака до работниците, што би претставувало зголемување од девет проценти во однос на 2022 година.
Прогнозата е дополнителна потврда за закрепнувањето на Huawei од ефектите на американските санкции кои го ограничија пристапот на кинеските компании до клучните глобални технологии како што се полупроводниците од 2019 година. „После години напорна работа, успеавме да ја пребродиме бурата и повторно работиме повеќе или помалку нормално“, тврди Ху.
Според него, одделот за уреди на Huawei, кој вклучува и мобилни телефони, постигна подобри резултати од очекуваните оваа година.
Во август, компанијата ја изненади светската јавност со новата серија мобилни телефони Mate60, за кои се верува дека имаат вградени чипови развиени во Кина. Многумина ја протолкуваа серијата како враќање на Huawei на пазарот на мобилни телефони во високата категорија по долгогодишните проблеми предизвикани од американските санкции.
Во октомври Huawei испорача 83 отсто повеќе мобилни телефони отколку во истиот период минатата година и беше моторот за раст од 11 отсто на кинескиот пазар, според Counterpoint. Во следната година менаџментот планира да го прошири бизнисот во сегментот на уреди.
„Нашиот бизнис со уреди мора да биде уште поподготвен за развој на најдобрите производи во својата класа и изградба на врвен бренд со човечки допир“, се вели во писмото до вработените.