Украина нема да го продолжи договорот за гас со Русија, изјави денеска украинскиот претседател Володимир Зеленски и додаде дека се водат преговори за испраќање природен гас од Азербејџан во Европската унија.
„Договорот за замена на рускиот гас со азербејџански е еден од предлозите“ за кои во моментов се разговара. „Украина се обидува да ја задржи својата улога на транзитна земја и да им помогне на своите западни соседи да обезбедат енергетска безбедност“, рече Зеленски во интервју за телевизијата Блумберг.
Европа се обиде да се одвикне од рускиот гас по руската инвазија, но некои европски земји продолжуваат да го носат преку гасовод што минува низ Украина.
Договорот што го опфаќа овој транзитен аранжман истекува на крајот на 2024 година, а со оглед на тоа што војната сè уште беснее, многу аналитичари очекуваат протокот на гас да престане, наведува Блумберг.
„Не сакаме да го продолжиме договорот за гас со Руската Федерација. Не сакаме тие да заработуваат овде. Сега се разгледуваат алтернативни чекори, како да го користиме гасоводот со друг снабдувач на гас, друга земја. Преговори се во тек“, рече Зеленски.
Блумберг претходно објави дека минатиот месец европските претставници преговарале да го задржат протокот на гас низ Украина.
Азербејџан тврди дека е на пат да го удвои извозот на гас во Европа
Украина порано беше главниот канал за руски природен гас до Европа, задоволувајќи околу една четвртина од потребите на ЕУ.
Транзитот се намали откако Русија започна со алтернативни рути, но сепак испраќа околу 15 милијарди кубни метри гас до ЕУ годишно преку Украина, главно во Словачка и Австрија.
Азербејџан изјави дека сака да го зголеми извозот на гас во Европа, но сè уште нема обезбедено доволно долгорочни договори за да инвестира во понатамошно производство, пренесува Танјуг.