Екстерното тестирање треба веднаш да се укине а образованието да се ослободи од стегите на партијата на власт. Оваа власт мора да си замине, за да го вратиме достоинството на наставниците и професорите и да донесеме решенија за нормален образовен систем, изјави денеска Петар Атанасов од СДСМ откако беа објавени резултатите од годинешното екстерно тестирање.

– Екстерното тестирање како проект предизвика многу фрустрации, ги натера децата да учат на памет, тренираше строгост, ги измалтретира родителите и ги деградира наставниците. Лошите законски решенија направија хаос во образовниот процес.Останаа одредбите од член 97 од Законот за основно и член 70а од Законот за средно образование, каде што децидно е кажано дека „на наставник кој и по две години од добивањето на стручната помош, повторно ќе биде во групата на наставници кај кои има најголеми отстапувања во добиените показатели, му престанува работниот однос“. Имено, пропишано е дека „решение за престанок на работниот однос на наставникот донесува директорот на основното училиште“ и дека наставникот може да се жали на суд. Така, доаѓаме до главната цел на стратешкиот проект, таканареченото екстерно тестирање, кој Владата на Никола Груевски го смисли за да може да ги контролира и да ги брка од работа сите оние кои не се послушни и кои не ги спроведуваат нивните лудории – рече Атанасов.

Тој додаде дека каква ќе биде оценката од екстерното тестирање зависи од добрата волја на Владата.

– Министерството за образование секоја година ги менува маргините за освоени поени и освоена оцена. Годинава критериумите се построги од минатата година – вели Атанасов.