Синоќешните протести го радикализираа отпорот. Сè повеќе луѓе на улиците и сè поголемо незадоволство и револт кон одлуките на власта сами да се помилуваат за криминалите. Протестантите вчера кршеа и демилираа излози, ја запалија фотељата на претседателот Иванов на симболичен начин надвор од неговата канцеларија, и се судрија со полицијата. Се палеа и слики на Иванов.

Епилогот е целосно демолирана Канцеларија на претседателот во центарот на Скопје, искршени прозорци на Министерството за правда, жестоки судири со полицијата и приведени  12 демонстранти, повреден новинар и фоторепортер.

Приведени десетина демонстранти во центарот на Скопје

И вчера демонстрантите против одлуката на Иванов колективно да помилува 56 лица, првин тргнаа од пред зградата на СЈО како знак на поддршка, а потоа се упатија кон Канцеларијата на претседателот, пред Парламентот, и беа спречени да отидат пред седиштето на ВМРО ДПМНЕ.

Нешто повеќе од три часа илјадници демонстранти во центарот на Скопје неуморно скандираа „Нема правда, нема мир“, „Оставки“ , “робија за криминалците“.

Барањата се: Оставка од претседателот Иванов, повлекување на неговата одлука за аболиција, техничка влада која ќе ја извади државата од криза и ќе организира фер и кредибилни избори.

Хронолошки  гледано: откако во 18 часот граѓаните со аплаузи и скандирања ги поздравија обвинителите во Специјалното јавно обвинителство, тие се упатија кон Канцеларијата на Претседателот на Рекорд. Таму, канцеларијата беше буквално демолирана. Демонстрантите со јајца, пластични шишиња и факели, петарди фрлаа кон Канцеларијата, потоа беа скршени прозорите, а се палеа и фотографии од Иванов.

Демонстрантите велат дека бараат сите кои сториле криминал да одговараат за своите дела, а Иванов да престане да ја опструира работата на Специјалното обвинителство кое отвори неколку истраги за сериозни криминални дејствија. Час и половина демонстрантите беа спречени од кордон на специјалци протестот да го продолжат кон Собранието. 

Причината беше што истовремено и пред Собранието се одвиваше контрапротест на ГДОМ  за поддршка на Иванов и против Заев кои беа носени под наредба и со автобуси од повеќе градови.

Откако контрадемонстрантите оддржаа говори пред Парламентот, па се префрлија пред седиштето на СДСМ, специјалците дозволија демонстрантите од кај Канцеларијата на Претседателот да продолжат кон Собранието.

И таму ги пречекаа специјалци, на кои демонстрантите им извикуваа “Засрамете се“, „Кого штитите“?  По половина час, откако демонстрантите решија да продолжат кон штабот на ВМРО-ДПМНЕ настана судир со полицијата. Демонстранти се обидуваа да го пробијат кордонот, се фрлаа лименки, петарди, вода и пластични шишиња, но обидот беше неуспешен. Тука имаше неколку повредени.

Револтирани од фактот дека се спречени да протестираат пред штабот на ВМРО-ДПМНЕ, дeмонстрантите се вратија кај Канцеларијата на Претседателот и Mинистерството за правда кои беа демолирани целосно. Демонстрантите ги кршеа прозорите на двете институции.

Во турканиците настрада и новинарот на Плус Инфо Горан Наумоски, кој е удрен со пендрек во главата и е пренесен со возило на Итната помош во Градската болница.

Со водени топови и засилени кордони, специјалците ги блокираа сите пристапи до штабот на владејачката партија, што предизвика уште поголем револт кај демонстрантите. Во растерување на толпата, приведени се 12 демонстранти, а има и повредени фоторепортери и активисти.

По три и пол часа протест  и судири полицијата  успеа да ги растера граѓаните во различни правци, со што протестот заврши околу 22 часот.

Контрапрпотестантите иако во значителен број немаа судири со полицијата и по говорите и соборањето пред седиштето на СДСМ со автобуси и комбиња се вратија во своите градови , без никакви инциденти.

Останува најавата дека демонстрациите продолжуваат  и денеска од СЈО во 18 часот.