Опозициската СДСМ денеска соопшти дека „нема никаков хаос во Министерството за внатрешни работи туку воведување законски ред и обезбедување целосно почитување на законите, транспаретното и одговорно работење на МВР во интерес на граѓаните“.
– Одлуката на министерот за внатрешни работи Оливер Спасовски дека престануваат да важат сите пренесени овластувања од министрите кои раководеле со МВР од денот на изборот на новиот министер е за да се спречат сите злоупотреби, се вели во соопштението од СДСМ.
Според СДСМ, преку проектот „Вистината за Македонија“ „граѓаните ги слушнале злоупотребите во МВР, како незаконското прислушување и функционирањето на Министерство како штаб на ВМРО-ДПМНЕ за време на изборите“.
– Нема веќе злоупотреба на државните институции. Министерството за внатрешни работи, како државна инситуција, ќе им служи на сите граѓани во Македонија, а не само на една партија како досега, наведува СДСМ.