Електричниот летечки автомобил со две седишта Alef Model A развиен од американската компанија Alef Aeronautics достигна 2.850 пред-нарачки.
Развојната компанија со седиште во Сан Матео, Калифорнија, поддржана од SpaceX на Елон Маск, планира да им наплати на клиентите 300.000 долари за Model A, за да може да заработи повеќе од 850 милиони долари со 2.850 нарачки однапред.
Клиентите можат да го нарачаат летечкиот модел преку Интернет, со депозит од 150 долари што можат да го повлечат во секое време, пишува CBNC.
„Имаме нешто повеќе од 2.850 нарачки однапред, што го прави Model A најпродаваното летечко возило во историјата, надминувајќи ја комбинираната продажба на Boeing, Airbus, Jobi Aviation и повеќето eVTOL“, рече извршниот директор на Alef, Џим Дуковни.
Alef Aeronautics е една од неколкуте развојни фирми кои се обидуваат да го направат летечкиот автомобил реалност.
Lilium, германски стартап кој развива летечко такси, исто така работи на ова, како и кинеската Jobi Aviation. Минатата година, јужнокорејската телекомуникациска компанија SKTelecom објави за CNBC дека планира да лансира услуга за летечки такси во партнерство со Jobi Aviation во 2025 година.
Повеќето играчи на пазарот во моментов градат модели слични на авиони кои доаѓаат со прицврстени крила или големи ротори слични на хеликоптер.
Моделот A на Alef, претставен на Светскиот конгрес за мобилни телефони, наликува на вистински автомобил со мрежеста обвивка која ги штити внатрешните ротори кои дозволуваат воздухот да тече низ возилото.
Дуковни го нарекува „првиот летечки автомобил во историјата“ затоа што изгледа различно од конкуренцијата која развива возила слични на дронови.