Џек Торн и Стивен Греам добија бројни пофалби за нивната криминалистичка серија „Адолесценција“ (Adolescence) за нејзиното прикажување на „incel“ културата и машкото насилство. Сепак, начинот на кој серијата ја прикажува радикализацијата на 13-годишниот Џејми преку мизогинистичка онлајн содржина предизвика загриженост кај многу родители за онлајн однесувањето на нивните деца и начинот на кој комуницираат.
За многу родители, оваа загриженост е усложнета од стравот дека, слично на возрасните во „Адолесценција“, тие честопати не се свесни за јазикот што децата го користат на интернет за да шират опасни идеи. Ваквите грижи одразуваат долга историја на паника поврзана со јазикот на младите. Но, дефинирањето или забраната на емотикони нема да ги реши подлабоките основни проблеми, пишува „The Conversation“.
Емоџи во серијата „Адолесценција“
Серијата ги следи Џејми и неговото семејство откако е обвинет за убиство на неговата соученичка Кејти. Во втората епизода, Адам, синот на инспекторот Лук Баскомб, го корегира погрешното толкување на неговиот татко на серија емотикони што Кејти ги објавила на Инстаграм профилот на Џејми.
Додека Баскомб претпоставува дека емотикони како 💯 и 💥 имаат романтична конотација, Адам објаснува дека тие, во овој контекст, се поврзани со „маносферата“ на интернет. Иако Баскомб првично одбива да го прифати ова објаснување, Адам го убедува со примери за различните значења на емотикони со различни бои на срца: црвено срце означува „љубов“, додека портокалово значи „ќе бидеш добро“. Адам нагласува: „Сè си има свое значење“.
Оваа сцена јасно го покажува генерацискиот јаз во начинот на кој се перцепираат и користат емотиконите. За родителите на Џејми и Адам, емотиконите се претежно украси. За тинејџерите, тие често носат важни пораки.
Емоџите често зависат од контекстот
Ова не е прв пат загриженоста за разликите во комуникацијата меѓу генерациите да одразува пошироки социјални тензии. Медиумите честопати го поврзуваа младинскиот жаргон со проблемите во образованието, па дури и со криминалот. Ваквите загрижености поттикнаа дебати околу тоа дали употребата на сленгот од генерацијата Алфа и генерацијата З треба да се забрани во австралиските училишта.
Иако фрустрацијата на родителите и наставниците е разбирлива, лингвистичките истражувања покажуваат дека негативниот став кон јазикот на младите ги демотивира младите, ја зголемува нееднаквоста и непотребно ја продлабочува меѓугенерациската тензија.
Емоџите честопати зависат од контекстот. Слично на гестовите во говорот, важно е да се разберат емотиконите во рамките на специфичните разговори и заедници во кои се користат. Не постои универзална врска помеѓу употребата на емотикони и внатрешната емоционална состојба што би важела за сите тинејџери или корисници.
Идеологијата на црвеното апче
Наместо да се плашите од вакви емотикони или да ја забраните нивната употреба, многумина советуваат да разберете како и зошто се користат во различни контексти. Постојат многу достапни ресурси за ова, како што е EmojiPedia, која опишува дека емотиконот 💊 може да означува лекови, дроги или метафорично „будење“ кон контроверзен поглед на светот.
Токму таканаречената црвена пилула 💊 е веројатно најчесто користениот термин и емоџи меѓу таканаречените „incel“ (инцели). За неупатените, најблискиот превод на зборот „incel“ би бил „милитантен кретен“ – односно тинејџер или маж кој ги мрази жените затоа што ниедна од нив не го сака. „Црвена пилула“ е референца на филмот Matrix – идејата е дека секој од инцелите „ја открива вистината“ така што се вклучува онлајн, наоѓа неколку апсурдни објаснувања за својот неуспех и почнува да ги мрази жените.
Терминот наскоро го презедоа Ендру Тејт и слични инстант гуруа, кои ги сметаа таквите несреќници за лесен извор на профит и почнаа да им продаваат секакви глупави курсеви за машкост.
Луѓето реагираат различно на емоџи
Емоџите се намерно дизајнирани да бидат флексибилни и да се користат креативно. Unicode, организацијата што одобрува нови емотикони, бара секое ново емоџи да може да има повеќе различни значења.
Истражувањата, исто така, покажуваат дека луѓето реагираат различно на емоџи. Студија од 2018 година покажа дека постарите мажи најчесто ги сметаат за збунувачки и иритирачки, додека младите жени гледаат позитивно на нив во комуникацијата.
Што да се прави?
Многу експерти предупредуваат дека онлајн мизогинистичките движења и заедниците на „црвени апчиња“ можат сериозно да им наштетат на ранливите млади луѓе. Сè повеќе се истакнува дека нивната растечка популарност е проблем на кој општеството мора да обрне внимание – но многу аналитичари нагласуваат дека јазикот што го користат младите луѓе на Интернет не е главната причина за овие феномени.
Според многумина, родителите не можат да ја спречат радикализацијата на младите мажи едноставно со проучување на значењето на емотикони, ниту пак наставниците можат да ја искоренат мизогинијата со забрана на употреба на емотикони и сленг во училиштата.
Наместо тоа, сè повеќе се препорачува да се нагласува охрабрувањето на отворени и искрени разговори меѓу генерациите, што е потврдено од примерите од серијалот „Адолесценција“, како што е односот меѓу Адам и неговиот татко. Таквиот пристап, според многу мислења, може да придонесе за подобро разбирање на меѓусебните разлики и да го намали чувството на социјална изолација што може да ги направи младите луѓе поподложни на радикализација.