На јужната хемисфера, годишните времиња се обратни во споредба со нашата северна. Така, додека поминуваме низ летните горештини, всушност е – зима во Австралија.
Но, во позадина на глобалното затоплување, таму воопшто не е студено.
Напротив…
Во една област на брегот на северозападна Австралија, Џампи Саунд, во понеделник, 26 август, измерени се 41,6 °C. Ова е највисоката температура забележана досега во текот на зимата во оваа земја.
Истиот ден, прагот од 40 °C беше достигнат во шест градови.
Претходниот национален рекорд беше 41,2 °C измерен во август 2020 година во Робак на запад. Таа бројка ја достигна и живата во термометарот во Џампи Саунд во вторник на 27 август.
Како резултат на тоа, Австралија два дена по ред ги доживеа најтоплите зимски денови во историјата на мерењата.
Рекорден топлотен бран всушност е во тек низ Австралија. Иако зимите во тие области се релативно благи, забележаните температури се поврзани со летото. На големи делови од територијата минатиот викенд беше значително потопло од вообичаено, главно за десет Целзиусови степени.
За илустрација, во оддалечениот град Удната во Јужна Австралија, во петокот на 23 август биле измерени 38,5 °C, додека следниот ден била уште потопло – 39,4 °C. Според податоците на веб-страницата Weather & Climate, овие мерења отстапуваат од нормалата за 12,1 и 12,9 °C и се нови рекордни дневни температури.
Но, не само тоа… Падна и историскиот рекорд за август во Удната од далечната 1946 година (36,5 °C), а 39,4 °C е највисоката измерена августовска температура во цела Јужна Австралија.
Необичната топлина ја носи системот со висок притисок, известува Science Alert, и преку почисто небо со повеќе сонце и преку спуштање на воздухот што предизвикува затоплување.
Но, покрај редовното и често рушење на температурни рекорди, ваквото топло време носи и други – видливи – последици: растение со интересни цветови, наречено кенгурова шепа, југоисточно од Мелбурн процвета веќе во јули, пишува Гардијан. Обично, ова се случува во септември.
Знаци на рана пролет може да се видат и во однесувањето на птиците и инсектите кои се поттикнати од предвремено расцутената вегетација.
Вакви временски услови се случиле и порано во Австралија.
Сепак, сегашната топлотна епизода, во позадина на зголемената температура, е екстремна.
Како што наведува непрофитниот медиум Climate Central, кој се состои од научници и научни новинари, на социјалната платформа X (поранешен Твитер), многу од најтоплите зимски историски рекорди, поставени на северот на земјата, имале индекс на климатски промени од пет.
Тоа значи дека вакви високи температури биле пет пати поверојатно. Со други зборови, кога би живееле во свет без климатски промени, тоа би било речиси невозможно.
📍Australia: Many all-time hottest Winter records set across north portions of the country had a Climate Shift Index of 5. Meaning, this extreme heat was made (at least) 5 times MORE likely to occur.
Simply put: heat made almost impossible without a boost from climate change https://t.co/s7kha8jOdn pic.twitter.com/g0ALxTzc6F
— Climate Central (@ClimateCentral) August 27, 2024