Кинески параглајдерист случајно се искачи на неверојатни 8.000 метри височина – речиси колку Монт Еверест – откако силен вертикален ветер го однел високо над планираната рута. Иако преживеа драматично искуство и го сними целиот лет со камера, властите му изрекоа шестмесечна забрана за летање. Пенг Јуџианг полетал од планините Килијан во северна Кина, на надморска височина од околу 3.000 метри.
Неговиот план бил само да тестира половна опрема што неодамна ја купил, без намера навистина да лета. Но, околу 20 минути по лансирањето, бил фатен од силен вертикален воздушен струен удар кој го однел на височина поголема од 8.000 метри – висина што ја достигнуваат и комерцијалните авиони. Температурата на таа височина паднала на -35°C, а камерата поставена на неговата опрема го покажува Пенг како лета над облаците, облеан во мраз. Во еден момент, како што изјавил подоцна, се дезориентирал и накратко изгубил свест.
„Рацете ми беа вкочанети. Се обидував да комуницирам преку радио, но беше тешко“, раскажува Пенг со насмевка во видео снимено веднаш по слетувањето.
Пенг има околу пет години искуство со параглајдинг, но овој лет не бил пријавен кај надлежните органи, што значи дека не поседувал никакви дозволи. Затоа, и покрај тоа што успеал да слета без повреди на околу 30 километри од местото на поаѓање, властите му изрекоа шестмесечна забрана за параглајдинг. Дополнително, неговиот пријател Гу Жимин, кој останал на земја и објавил видео од летот на кинеската платформа „Доујин“ (кинески TikTok), исто така доби иста казна.
Според извештајот од локалната воздухопловна спортска асоцијација, инцидентот не бил намерен, туку резултат на ретка и непредвидлива природна појава. „Нормален човек не може свесно да се издигне на таква височина без кислород. Тоа не било планирано“, изјави портпарол на спортското биро.
Иако јавноста остана воодушевена од видеото, кое стана вирално и предизвика бројни коментари на социјалните мрежи – од шок до восхит – властите потенцираа дека без соодветни дозволи, ваквиот лет не може да се признаe како официјален рекорд. Инаку, Пенг со својот лет бил блиску до светскиот рекорд за највисок параглајдинг лет, поставен во 2007 година од Германката Ева Вишњевска, која достигна 9.946 метри надморска височина.
На крајот, авантурата на Пенг заврши среќно, но и како потсетување за опасностите од екстремните спортови без претходна најава и соодветна подготовка.