Во една од најшокантните пресуди во поновата историја на Франција, пензионираниот хирург Жоел Ле Скурнек (74) е осуден на 20 години затвор, откако призна дека сексуално злоупотребувал 299 пациенти, најголемиот дел од нив малолетници. Судењето, кое се смета за најголемиот случај на сексуална злоупотреба на деца во Франција, откри ужасни детали за злоупотребите што траеле од 1989 до 2014 година.
Според обвинителите, Ле Скурнек признал дека извршил злоупотреба врз 158 машки и 141 женски пациент, со просечна возраст од само 11 години. Во обвинението се наведува дека тој ги третирал своите жртви како „неживи предмети“, без трошка емпатија, и ја злоупотребувал довербата што ја добивал како медицински професионалец. Во многу случаи, жртвите биле под дејство на анестезија или биле толку млади што не можеле да разберат дека се жртви на злоупотреба.
Случајот ја потресе француската јавност и отвори бројни прашања за тоа како ваков човек успеал толку долго да продолжи со своите монструозни дела. Особено загрижува фактот што Ле Скурнек уште во 2005 година добил условна казна за поседување детска порнографија — но сепак продолжил да работи како лекар и да има пристап до деца. Многумина се прашуваат зошто здравствените власти не презеле мерки порано и како системот дозволил толку многу жртви да паднат во рацете на човек кој требало да се грижи за нивното здравје и безбедност. Со оваа пресуда, судот испрати силна порака, но за многу семејства и жртви, правдата дојде предоцна.