Протести се одржуваат во главниот град на Венецуела, Каракас, по спорните резултати од претседателските избори. Претседателот Николас Мадуро нареди распоредување на воени и полициски сили низ целата земја. Илјадници луѓе се собраа вчера во центарот на Каракас за да го покажат своето противење на тврдењата на претседателот Мадуро за победа на претседателските избори, јавува Би-Би-Си.
Многумина рекоа дека нема да запрат додека не дојде нова влада, а некои рекоа дека тоа ќе се случи само доколку безбедносните сили им се придружат на опозициските демонстранти. Сепак, армијата и полицијата досега му останаа лојални на Мадуро и употребија солзавец и гумени куршуми кон демонстрантите.
Локалните власти соопштија дека веќе се уапсени околу 750 лица, додека две големи невладини организации велат, како што беше соопштено вчера, дека има и загинати и повредени.
Министерот за одбрана на Венецуела вчера ги опиша протестите како „државен удар“.
Опкружен со вооружени војници, генералот Владимир Падрино прочита изјава во која се вели дека претседателот Николас Мадуро има „апсолутна лојалност и безусловна поддршка“ од војската.
Протестите избија во понеделникот откако шефот на Националниот изборен совет, кој е член на партијата на Мадуро и некогаш работел како негов правен советник, го прогласи за победник на изборите.
Националниот изборен совет претходно соопшти дека Мадуро победил со 51 отсто од гласовите, пред опозицискиот кандидат Едмундо Гонзалес кој освоил 44 отсто. Сепак, Избирачкиот совет засега не ги објави деталните резултати од гласањето. Опозицијата тврди дека резултатот што го објави советот бил лажен.