Ferrari го претстави новиот 296 Speciale, специјална верзија на својот plug-in хибриден модел Berlinetta со мотор поставен во средината.
Најновата креација од Маранело ја продолжува ексклузивната линија на специјални модели на Ferrari Berlinetta: Challenge Stradale, 430 Scuderia, 458 Speciale и 488 Pista, од кои секој постави нови стандарди во однос на задоволството при возењето. Сега е ред на 496.
Погонскиот склоп 296 Speciale испорачува вкупна моќност од 880 КС, 50 КС повеќе од стандардниот 296 GTB и рекорд за Ferrari со погон на задните тркала. Бензинскиот V6 двоен турбо мотор сега развива 700 КС (37 повеќе од основниот модел). Електричниот мотор е надграден и сега испорачува 180 КС во новиот „extra boost“ режим.
Новата стратегија за контрола на 8-степениот DCT менувач користи дополнителен вртежен момент при менување на брзините, што го скратува времето на менување брзини и ги зголемува перформансите и искуството при возење. Сето ова заедно значи 2,8 секунди до 100 км/ч и максимална брзина од над 330 км/ч.
296 Speciale генерира 435 кг потисок при 250 км/ч, што е за 20% повеќе од 296 GTB, благодарение на иновативните решенија развиени на моделот 296 Challenge. Тие вклучуваат аеро пригушувач интегриран во предната хауба и вертикални перки на задниот дел од возилото.
Активниот заден спојлер користи нова стратегија за контрола што го скратува времето на премин помеѓу конфигурациите со низок отпор (LD) и висок потисок (HD) за 50%, а исто така воведува и нова конфигурација со среден потисок (MD) што ја подобрува стабилноста на задниот дел при големи брзини.
Италијанците обрнаа големо внимание на намалувањето на тежината, што резултираше со зголемено задоволство при возењето. Вкупната тежина е намалена за 60 кг во споредба со 296 GTB со употреба на материјали како што се јаглеродни влакна за делови од каросеријата и титаниум за компонентите во моторот. Резултирачкиот однос тежина-моќ е само 1,60 кг/КС, рекорд за Ferrari Berlinetta со погон на задните тркала.
Дизајнерскиот јазик на 296 Speciale има јасни врски со тркачките автомобили на Ferrari. Додека 296 GTB ги крие своите екстремни перформанси под елегантниот екстериер, 296 Speciale усвојува многу порадикален стилски лексикон. Предниот дел од автомобилот дава впечаток на моќни перформанси со хауба што изгледа поиздлабена и истакнат сплитер што визуелно го проширува моделот.
Впечатливата нова боја Verde Nürburgring е развиена специјално за 296 Speciale. Исто така, постои и нова ливреја, сега за прв пат понудена во бела верзија, која се состои од една или две надолжни ленти кои се протегаат по целата должина на автомобилот.
Внатрешноста е поедноставена, со помалку елементи и уште пообемна употреба на јаглеродни влакна и алкантара. Панелот на вратата се состои од еден блок од јаглеродни влакна со минималистички дизајн, а централниот тунел е структура направена целосно од јаглеродни влакна.
296 Speciale, како и сите модели на Ferrari, доаѓа со седумгодишна програма за одржување што ги опфаќа сите рутински сервиси во текот на првите седум години од животниот век на автомобилот. Овој веќе колекционерски предмет е очекувано скап, за оние кои се запознаени со тој свет на возила цената е само 400.000 евра.