Google случајно откри голем редизајн на оперативниот систем Android, наречен Material 3 Expressive.
Во сега избришан блог пост, Google ја опиша промената како „многу истражувана“ надградба насочена кон тоа корисничкиот интерфејс да биде попривлечен и полесен за користење. Но, пред објавата да биде отстранета, страницата беше архивирана, додека 9to5Google објави дел од содржината.
Како што е наведено во објавата, Google го разви Material 3 Expressive по спроведување на 46 рунди на дизајн и истражување во кои учествуваа повеќе од 18.000 испитаници. Дизајнот користи бои, форми, големини и движења за да го направи производот „поупотреблив“. Новиот дизајн ќе биде дискутиран и на I/O конференцијата на Google овој месец.
Истражувањето на Google анализираше на што луѓето обрнуваат внимание кога станува збор за дизајнот, како реагираат на различни распореди и колку брзо го разбираат интерфејсот. Исто така, беа оценети поединечни елементи како што се „кој индикатор за напредок го прави времето на чекање да изгледа пократко“ и „колку големо може да биде едно копче за да се подобри времето на допирање без да се преоптоварат другите елементи“.
Google изјави дека Material 3 Expressive дизајнот им овозможил на луѓето да ги пронајдат клучните елементи во интерфејсот до четири пати побрзо во споредба со постоечкиот Material 3 дизајн. Исто така, Material 3 Expressive „ги изедначува условите за корисници од сите возрасти“, бидејќи дизајнот им помога на луѓето над 45 години да ги согледаат елементите на интерфејсот исто толку брзо како и помладите корисници.
Во текот на изминатите неколку дена, се појавија извештаи дека Google ќе воведе промени во корисничкиот интерфејс на Android, вклучувајќи редизајнирани икони на лентата за статус (како иконата на батеријата), нов фонт на часовникот и обновено мени за брзи поставки. Други информации укажуваат на промени во апликацијата Google Clock.
Кога Google официјално ќе го претстави Material 3 Expressive, сè уште не е познато.