Tesla објави снимка од првата испорака на автономен автомобил во светот. „Овaa Tesla самa се вози од својата фабрика во Тексас до домот на својот нов сопственик, на околу 30 минути оддалеченост, преминувајќи паркинзи, автопати и градот за да стигне до својот нов сопственик“, соопшти компанијата.
Електричниот автомобил Tesla Model Y во овој случај немаше возач ниту патници и не беше управуван од далечина. Настанот означи уште една фаза во демонстрацијата на Tesla за технолошкиот напредок во автономното возење.
Според Ашок Елусвами, раководител на одделот за вештачка интелигенција и автопилот на Tesla, електричниот автомобил достигна максимална брзина од 72 милји на час (приближно 116 км/ч) за време на патувањето. Сопственикот на компанијата, Елон Маск, претходно објави дека првата испорака на автономен автомобил ќе биде извршена на 28 јуни, но сè се случи еден ден порано.
За потсетување, Tesla ги лансираше првите јавни возења на своето долгоочекувано роботакси, целосно автономно возило без возач, во понеделник. Пилот-проектот досега вклучува десетина возила Model Y кои патуваат во ограничена зона во населбата „Јужен Конгрес“ во Остин, при што вработен во Tesla е присутен на секое возење за да го следи системот од безбедносни причини.
Оваа фаза на тестирање е достапна само за поканети корисници, вклучувајќи влијателни лица и инвеститори, а цената по возење е фиксна на 4,20 долари. Возилата го користат најновиот софтвер на Тесла за целосно самостојно возење (FSD), кој се потпира на сопствена компјутерска платформа и систем на камери без LIDAR.